पोखरा : मंसिर ४ गते हुने प्रतिनिधिसभा तथा प्रदेश सभा सदस्य निर्वाचनमा बदर मत न्यूनीकरण गर्ने उद्देश्यले पृथ्वीनारायण क्यापसमा  नमूना मतदान गरिएको छ । 

गएको बैशाख ३० गते सम्पन्न भएको स्थानीय निर्वाचनमा मत बदर भएको भन्दै नेत्रहिन युवा संघ कास्कीले नमूना मतदान कार्यक्रम आयोजना गरेको हो । 

पोखरा महानगरपालिका १ बगरस्थित प्रतिनिधिसभा तथा प्रदेश सभा सदस्य निर्वाचन अन्तरगत पृथ्वीनारायण क्याम्पसमा आज (बुधबार) आयोजना गरिएको नमूना मतदानमा ७० मत खसेको थियो । 

पृथ्वीनारायण क्याम्पसमा नमूना मतदान केन्द्रमा खसेको ७० मत मध्ये ९ मत बदर भएको नेत्रहीन युवा संघ कास्कीका अध्यक्ष सूर्यप्रसाद भट्टराईले बताए । 

‘क्याम्पसमा नमुना मतदान गरेका छौं, उनले भने, ‘कार्यक्रम सञ्चालन हुँदा नै केही विद्यार्थीहरु आएर मतदान गर्नुभयो तर सुरुमा भएको मतदान नै बदर भएको पाइयो । त्यसैले मतदाता शिक्षा आवश्यक देखिन्छ ।’

उनले मत बदर कम गर्ने उद्देश्यसहित कार्यक्रमको आयोजना गरिएको बताए । ‘स्थानीय तह निर्वाचनमा मत बदर बढी भएकाले यसपटक बदर न्यूनीकरणका लागि नमूना मतदानको गरिएको हो, भट्टराईले भने, ‘मतदान गर्दा स्वष्तिक छाप लगाएर मतपत्र पट्याउन नजान्दा मत धेरै बदर भएको पाइएको छ । त्यसैले निर्वाचन आयोगले मतदाता शिक्षालाई तिव्रता दिन आवश्यक देखिन्छ ।’

नेत्रहीन युवा संघ कास्कीले अपाङ्गता भएका व्यक्तिहरुको लागि कार्यक्रम आयोजना गरिएको बताउदै मतदाता शिक्षा सबैलाई आवश्यक पर्ने भएकाले कास्कीको विभिन्न स्थानमा नमूना मतदान कार्यक्रमलाई निरन्तरता दिइने बताएइको छ ।